Кыргызстан-Азербайжан фондунун уставдык капиталы 100 млн долларга чейин көбөйтүлдү

Президент Садыр Жапаровдун Бакуга жасаган мамлекеттик сапарынын алкагында Кыргызстандын министрлер кабинети менен Азербайжандын өкмөтүнүн ортосунда Кыргызстан-Азербайжан өнүктүрүү фондунун уставдык капиталын 25 миллион доллардан 100 миллион долларга чейин көбөйтүү жөнүндө кошумча келишимге кол коюлду.

Экономика министрлигинин басма сөз кызматы билдиргендей, фонддун капиталын көбөйтүү Кыргызстандын аймагындагы артыкчылыктуу бизнес-долбоорлорду каржылоо үчүн фонддун финансылык ресурстарын көбөйтүүгө мүмкүндүк берет.

Фонд Кыргызстан менен Азербайжандын ортосундагы экономикалык кызматташтыкка көмөктөшүү, өнөр жайды модернизациялоо жана өнүктүрүү, экономикалык кызматташтыкты өнүктүрүү максатында түзүлгөн.

Фонд агроөнөр жай комплекси, тигүү жана текстиль өнөр жайы, кайра иштетүү өнөр жайы, кен казуу жана металлургия өнөр жайы, транспорт, турак жай курулушу, соода, энергетика комплекси, инфраструктураны өнүктүрүү, туризм жана башка секторлор сыяктуу тармактарда Кыргыз Республикасынын экономикасынын артыкчылыктуу секторлорунда өзүн актоочу долбоорлорду каржылайт.