Кыргыз-казак чегиндеги өткөрүү бекетинде кезек пайда болду

УКМКнын Чек ара кызматы 15-сентябрда кыргыз-казак чегиндеги «Ак-Тилек-автожол» жана «Карасуу-автожол» өткөрүү жайларында жүк ташуучу унаалардын кезеги пайда болгонун маалымдады.

Саат 16:00гө карата «Ак-Тилек-автожол» өткөрүү жайынын маңдайында Кыргызстандан чыгууга кезекте 140 автоунаа турган.

Казакстан тараптан Кыргызстанга кирүүгө 40 автоунаа кезек күтүүдө.

«Кыргыз-казак мамлекеттик чек арасында жүк ташуучу унаалардын топтолуусу күз мезгилинде жүк ташуунун агымы көбөйгөнүнө байланыштуу болууда, айрыкча, айыл чарба азык-түлүгүнүн Кыргызстандан башка өлкөлөргө экспорттолушу себеп болот. Транспорт каражаттарынын топтолуусу циклдик мүнөзгө ээ», — деп айтылат маалыматта.

Чек ара кызматы кыргыз тараптан да, казак тараптан да эч кандай чектөөлөр жок экенин белгилеп, эки мамлекеттин өткөрүү жайлары штаттык режимде иштеп жатканын кошумчалайт.