Садыр Жапаров Азербайжанга расмий сапар менен барат

Анын алкагында Садыр Жапаров Азербайжандын президенти Илхам Алиев менен эки тараптуу сүйлөшүүлөрдү өткөрөт. Ошондой эле кызматташуунун актуалдуу маселелерин талкуулашат.

Азербайжандын Милли Межлисинин төрайымы Сагиба Гафарова менен да эки тараптуу жолугушуу пландалууда.

Мындан тышкары азербайжандык ишкер чөйрөнүн өкүлдөрү менен жолугушуп, соода-инвестициялык кызматташтык тууралуу пикир алышат.

Жапаровдун расмий сапары Кыргызстан менен Азербайжандын ортосунда дипломатиялык алака түзүлгөнүнө 30 жыл, достук жана кызматташтык келишимине кол коюлганына 25 жыл толгон датага карата уюштурулган.

Жыйынтыгында стратегиялык өнөктөштүк жөнүндө декларацияга, мамлекеттер аралык кеңешти түзүү боюнча меморандумга, ошондой эле өкмөттөр жана ведомстволор аралык макулдашууларга кол коюу пландалууда.

Жээнбек Кулубаев алдыдагы сапар эки өлкө үчүн жаңы мүмкүнчүлүктөрдү ачат деген ишенимин билдирди.