Тамтыгы чыккан жолдорго Акылбек Жапаровдун ысымын берүү сунушталды (видео)

Өлкөдөгү тамтыгы чыккан жолдорго министрлер кабинетинин төрагасы Акылбек Жапаровдун ысымы берилиши керек. Мындай пикирин депутат Мирлан Самыйкожо Жогорку Кеңештин 14-апрелдеги жыйынында билдирди.

Депутат мындай демилгени жергиликтүү эл көтөрүп жатканын айтты.

«Жумгал, Ак-Талаа райондорунун жолдору качан оңолот? Барып эле 3-5 км жолду оңдоп кетишет, андай кыла берсе, бул жол 40 жылда салынып бүтөт. Ошол үчүн ал азыр мындай демилге көтөрүлүп жатат, «Жумгалдагы жыртылган, тамтыгы чыккан жолго Жапаровдун атын берели», — деп жатышат. Акылбек Жапаровдун аты ушундай жолго татыктуу болот. Мурда жаңы жолдорго ат берилип келсе, азыр тешилген жолдорго ысым берели. Бул — элдин демилгеси», — деди Мирлан Самыйкожо.

Андан тышкары Кочкор районундагы жайыт маселесин көзөмөлдөп коюуну өтүндү. Анын айтымында, бийлик барып, кур убада берип, тил эмизип кетип кала бергендин кесепетинен элдин маселеси жеринен чечилбей келет.