Чек арада түн тынч өттү. Сүйлөшүүлөрдүн жыйынтыгы тууралуу маалымат

Бүгүн, 13-апрелге карата кыргыз-тажик чек арасында абал тынч. Түн тынч өткөн, атышуу болгон жок. Бул тууралуу Чек ара кызматы кабарлады.

Түнкү саат 03:00дөн 03:55ке чейин Кыргызстандын «Кулунду» жана Тажикстандын «Овчи-Калача» көзөмөл-өткөрүү бекетинен Баткен облусу менен Согди облусунун жетекчилери жолугушту.

Андан тышкары сүйлөшүүгө эки өлкөнүн чек ара мекемелеринин, укук коргоо органдарынын жетекчилери катышты.

Тараптар төмөнкүдөй макулдашууларга барышты:

— туруктуу жайгаштыруу пункттарына кошумча күчтөрдүн жана каражаттардын чыгарылышын көзөмөлдөө боюнча чечим кабыл алынды. Ошол замат кошумча өздүк курам, аскердик техника, курал-жарактар чыгарылган.

— бүгүн, 13-апрелде саат 11:00дө Баткен облусунун Лейлек районундагы Селкана айылында окуя болгон жерде эки өлкө өкүлдөрүнүн кеңейтилген курамдагы жолугушуусун өткөрөт.

УКМКнын Баткен облусу боюнча башкармалыгынын бөлүмдөрү күчөтүлгөн тартипте иштөөгө өткөн.