Дирижёр Сагынбек Акматалиев дүйнөдөн кайтты

Кыргыз Республикасынын эл артисти, белгилүү дирижёр Сагынбек Акматалиев дүйнөдөн кайтты. Бул тууралуу Маданият, маалымат, спорт жана жаштар саясаты министрлигинин маалымат кызматы кабарлады.

Сагынбек Акматалиев 1952- жылы 1-декабрда Сокулук районуна караштуу Асылбаш айылында туулган.

Ал 1967-жылы — М. Күрөңкеев атындагы музыкалык окуу жайында, 1972-1976-жылдары — Бүбүсара Бейшеналиева атындагы Искусство институтунда, кийин 2005-жылы «Оркестрдин дирижеру» факультетинин профессору Насыр Давлесовдун классында окуп, артыкчылык диплому менен бүтүргөн.

Сагынбек Акматалиев эмгек жолун 1970- жылы Карамолдо Орозов атындагы эл аспаптар оркестрине музыкант-кыякчы катары иштөөдөн баштаган. Кийин оркестрдин концертмейстери, “Атай” – атындагы комузчулар ансаблинин жетекчиси болуп иштеп, дүйнөнүн көптөгөн мамлекеттеринде гастролдо болгон.

2005-жылдан 2022-жылга чейин улуу дирижер А. Жумакматов жана Э. Жумабаевдердин сунуштамасы жана аталган оркестрдин башкы дирижёру жана көркөм жетекчиси болуп иштеп келген.

С. Акматалиев оркестр үчүн  200 гө жакын ыр-күүлөрдү иштеп чыккан. Ал көптөгөн союздук жана эл аралык конкурс-фестивалдардын катышуучусу, лауреаты болгон

Сагынбек Акматалиевдин кыргыз улуттук музыкасынын өнүгүп-өсүшүнө кошкон салымы жогору бааланып:

1987-жылы — Кыргыз ССРинин Жогорку Советинин Ардак грамотасына;

1994-жылы — «Кыргыз Республикасынын эмгек синирген артисти» ардактуу наамына;

2011-жылы — «Кыргыз Республикасынын эл артисти» ардактуу наамына ээ болгон.