Кыргызстандын Өзбекстандагы элчилигинде добушкана ачылды

Кыргызстандын Өзбекстандагы элчилигинде жергиликтүү убакыт боюнча саат 8:00дө добуш берүү үчүн №9025 шайлоо участогу ишин баштады.

Бул тууралуу элчиликтен кабарлашты. Мыйзамдарга ылайык, шайлоо тилкеси жергиликтүү убакыт боюнча саат 20:00гө чейин иштейт.

Бүгүн, 28-ноябрда Кыргызстанда Жогорку Кеңештин депутаттарын шайлоо күнү. Учурда жалпы кыргызстандыктардын добуш берүүсүн камсыздоо үчүн чет өлкөдөгү элчилик жана консулдуктарда жалпы 59 шайлоо участогу уюштурулган.

БШКнын төрайымы Нуржан Шайлдабекова билдиргендей, Бишкек убактысы боюнча түнкү саат 03:00дө алгачкы шайлоо участогу Орусиянын Түштүк-Сахалинск аймагында ачылды. Учурда чет өлкөдөгү жалпы 16 шайлоо участогу иштеп жатат. Калган добуш берүүчү жайлар жергиликтүү саат 08:00дө иштеп баштайт.

Парламенттик шайлоо бул жолу жаңы система менен өтүп жатат. Анда 36 депутат бир мандаттуу шайлоо округунан, 54 депутат партиялык тизме менен шайланат. Шайлоо тартиби партиялык тизме үчүн преференциалдык система менен болуп, шайлоочулар партияны жана партиянын ичинен талапкерди тандай алышат.