JIA бизнес-ассоциациясы ишкер аялдардын ири форумун өткөрөт

Бишкекте 16-ноябрда JIA бизнес-ассоциациясынын «Айым ишкерлер комитети» ишкер аялдардын форумун өткөрөт.

«Айым ишкерлер комитетинин» 10 жылдыгына арналган «Ийгилик, өсүү жана инновациялар» аталышындагы форум айым ишкерлерди тажрыйба алмашуу жана байланыштарды түзүү үчүн бириктирүүнү максат кылат.

Ага Кыргызстандын бардык аймактарынан тажрыйбалуу ишкер аялдар, бизнести жаңы баштагандар жана ишкерлик чөйрөсү менен таанышууну каалаган айымдар катыша алат, жалпысынан 400дөн ашык ишкер катышары күтүлүүдө.

Иш-чарада бизнес чөйрөсүндөгү жаңычылдыктар менен тааныштырылып, чакан, орто жана ири бизнес секторлору үчүн инновациялык чечимдер сунушталат. Форум аймактар аралык байланышты күчөтүп, бизнестеги айымдардын ийгиликтерин жана каръералык өсүшүн колдоого алат.

Ишкер аялдардын форуму 16-ноябрь күнү саат 13:00дө Novotel Bishkek City Center дарегинде өтөт.