Министрлик: Коронавирустан айыккандар эмделбейт деген түшүнүк туура эмес

Саламаттыкты сактоо министрлиги  COVID-19 менен ооруп айыккандар эмдөө албайт деген түшүнүк туура эместигин айтты. Бул жөн гана миф деп социалдык тармактагы баракчасына жарыялады.

Министрлик белгилегендей, ооруп айыккан адамдардын табигый иммунитети канча убакытка чейин сакталышы боюнча так маалыматтар жок. Коронавирустан айыгып, антитело пайда болгондор деле кайрадан ооруп калган фактылар катталууда. Мындан улам сиз COVID-19  менен ооруп айыккан болсоңуз да, вакцина алуу пайдалуу, — деп жазат Саламаттыкты сактоо министрлиги.

Буга чейин Саламаттыкты сактоо жана социалдык өнүктүрүү министри Алымкадыр Бейшеналиев президент Садыр Жапаров тууралуу: “Ал киши эмдөөдөн өтпөйт, анткени ал коронавирус менен ооруп айыкканына байланыштуу антитело пайда болгон. Эгер ага вакцина берсек, реакция жүрүп кетүүсү мүмкүн”, — деп билдирген болчу.

Белгилей кетсек, учурда өлкөдө коронавируска каршы эмдөө иштери башталганына бир жума болду. Бирок бул аралыкта болгону 600гө чукул адам эмдөө алган. Ал эми министрликтин түзгөн алгоритми боюнча 75 миң жаран апрелдин аягына чейин вакцинациялоодон өтүүсү керек.