Нарын: Жаранды атып өлтүрүүгө шектелген 2 жаран кармалды

Нарын облустук ички иштер башкармалыгынын кызматкерлери Нарын шаарынын Москва аймагында бир жаранды атып кеткен адамды табышты. Бул тууралуу Нарын ОИИБинин маалымат кызматы билдирди.

Ыкчам иликтөө иштеринин натыйжасында, шектүү катары мурда бир нече жолу соттолгон,  уюшкан кылмыштуу топтун мүчөсү катары Кыргыз Республикасынын ИИМдин ыкчам каттоосунда турган Нарын шаарынын тургуну 1996-жылы туулган М.Н кармалып, күнөөсүн толугу менен мойнуна алып, «ИЖ-20» үлгүсүндөгү ок атуучу куралды (документи жок) өз ыктыяры менен өткөрүп берди.

Ошондой эле кылмыш ишине тиешеси бар «Лексус GS 300» үлгүсүндөгү автоунаанын айдоочусу Нарын шаарынын тургуну 1997-жылы туулган А.А. кармалды.

Эскерте кетсек, буга чейин 6-февралда саат 20:40 чамасында милиция бөлүмүнө Нарын шаарындагы Москва чөлкөмүнөн бир адамды атып кеткендиги тууралуу маалымат келип түшкөн. Каза болгон С.А. аттуу жаран 32 жашта болгон. Ал дагы уюшкан кылмыштуу топтун мүчөсү катары Кыргыз Республикасынын ИИМдин ыкчам каттоосунда турат.