«Сапаттын» окуучулары Эл аралык математика олимпиадасында медаль утту

Эл аралык математика олимпиадасында “Сапат” билим берүү мекемесинин окуучулары коло медалга ээ болушту. Бул тууралуу аталган мекеменин коомчулук менен байланыш бөлүмүнүн адиси Чыңгыз Исманов кабарлады.

Математика боюнча Эл аралык олимпиада 18-28-сентябрь күндөрү онлайн түрдө өттү. Ага 100 өлкөдөн 616 окуучу катышкан.

Кыргызстандын командасы 6 окуучудан түзүлүп, анын ичине Эл аралык “Сапат” билим берүү мекемесинин 2 окуучусу кирген.

Оштогу “Сема”  лицейинин 11-классынын окуучусу Эрдан Апиев коло медаль утту, Адиль Абдирасулов кызыктыруучу сыйлыктарга ээ болду.

61-эл аралык математикалык олимпиада сентябрь айында Санкт-Петербург шаарында өтмөк. Бирок пандемияга байланыштуу аралыктан өткөрүлүп, ар бир катышуучу берилген тапшырмаларды өз өлкөсүндө онлайн түрдө аткаруу шарты коюлган.

Олимпиада биринчи жолу 1959-жылы Румыния өлкөсүндө 7 мамлекеттин арасында өткөн.

Негизги максаты –математика илимдерин пропагандалоо, дүйнө жүзүндөгү мектептер арасында профессионалдык кызматташтыкты бекемдөө, ошондой эле таланттуу жаштардын мүмкүнчүлүктөрүн ачуу болуп саналат.