Каныбек Исаков: Дистанттык билим берүүнүн жетишпестиктери оңдолот

Билим берүү жана илим министри Каныбек Исаков шаардык жана райондук билим берүү бөлүмдөрүнүн жана облустук билим берүү институттарынын жетекчилери менен онлайн жыйын өткөрдү. Бул тууралуу министрликтин маалымат кызматы билдирди.

Министр Кыргызстанда биринчи жолу башталган дистанттык билим берүүнүн ийгилик жана кемчиликтерине токтолду.

— Жалпы алганда аралыктан билим берүү ийгиликтүү башталды. Бирок окуучулар менен кайтарым байланышты уюштурууда мобилдик интернеттин ылдамдыгы начар аймактар, айрым мугалимдердин маалымат-коммуникациялык компетенттүүлүгүнүн аздыгы жана телевизору жок үй-бүлөлөр боюнча көйгөйлөр жаралды, — деп белгилейт министр.

Исаков учурда мобилдик операторлору менен интернет байланышы начар аймактарда интернет сапатын жакшыртуу боюнча сүйлөшүүлөр жүргөнүн кабарлап, телевизору жок үй-бүлөлөрдүн маселелелери жергиликтүү бийликтин, демөөрчүлөрдүн жардамы менен чечилип жатканын кошумчалады.

Министр ошондой эле берилген үй тапшырмалардын көлөмү чоң, ага бөлүнгөн убакыт аз болуп жаткандыгы боюнча суроолор бар экенин белгиледи.

— Биринчи жолу аралыктан билим берүү уюштурулуп жатканына карабай, мугалимдерибиздин дарамети жакшы. Аны менен бирге телевизор, телефону жок үй-бүлөлөргө жардам колун сунган жергиликтүү бийлик жана демөөрчүлөргө ыраазычылык билдирем, -деди министр.