Испаниядан келген жигиттин апасы коронавирустан каза болдубу? Нурдиновдун жообу

«Испаниядан келген жарандын апасы каза болгондугу анык. Ал оорусун жашырганбы же жашырган эмеспи аны иликтеп жатабыз.» Бул тууралуу Ош шаарынын, Кара-Суу жана Ноокат районунун коменданты Малик Нурдинов билдирди.

Комендантка «Кара-Суу районунда Испаниядан келген жигит оорусун жашырып коюп, илдет апасына жугуп калгандыктан каза болуп калгандыгы чындыкка дал келеби?» деген суроо берилген.

Коменданттын айтымында, ал жигит Испаниядан 1-мартта келген.

— Ал оорусун жашырганбы же жашырган эмеспи аны иликтеп жатабыз. Бирок апасы каза болгондугу анык. Сөөктү жерге берүүгө 100-120 адам катышкан. Алардын баары анализ тапшырышты. Жашаган жеринин көчөлөрү дезинфекцияланды. Испаниядан келген жигит чын эле оорусун жашырган болсо, ал айыгып чыккандан кийин мыйзамдын негизинде чара көрүлөт, — деди Нурдинов.

12-апрелге карата Кыргызстанда коронавирусту жуктуруп алгандардын саны 377ге жетти. Алардын ичинен 63ү медицина дарыгерлери. Коронавирустан 54 жаран айыгып, 5 адам каза болду.