Төрөбаев: Министрлер кабинети ишкерликти ар тараптан колдоого даяр

Министрлер кабинетинин төрагасынын орун басары Бакыт Төрөбаевдин жетекчилиги алдында Чүй облусунун Ысык-Ата районунда жүзүм өстүрүү тармагын колдоого байланышкан көчмө жыйын өттү.

Өлкөнүн түштүк аймагы жүзүм өстүрүүгө климаттык шарты туура келгендиктен отурумга президенттин Ош, Жалал-Абад, Баткен облустарындагы ыйгарым укуктуу өкүлдөрү, агроөнөр жай тармагынан тиешелүү мамлекеттик мекемелер жана ишкерлер катышты.

Бакыт Төрөбаев өлкөдөгү ишкерликти ар тараптан колдоого министрлер кабинети даяр экендигин билдирди.

Жүзүм өстүрүү аркылуу экспортту дагы өнүктүрүүгө, аны менен жумуш орундарын түзүүгө болот. Бул үчүн өлкөнүн жагымдуу климаттык шарты, өндүрүштүк жана инфраструктуралык потенциалы бар экендигин кошумчалады.

Жүзүм өстүрүү көп убакытты талап кылгандыктан мамлекеттик колдоо катары салыкты жеңилдетүү, багбандарга далилдүү сунуштарды берүү сыяктуу багыттарды ишке ашырууда мамлекет активдүү катышат.

Жыйындын соңунда Төрөбаев тиешелүү мамлекеттик мекемелерге багбандар менен биргеликте жумушчу топ түзүүнү жана жүзүм өстүрүүнү колдоого байланышкан тиешелүү ченемдик укуктук актыларды даярдоо боюнча тапшырмаларды берди.