Президент суу транспортунун ишмердигин тартипке салууну тапшырды

Президент Садыр Жапаров эс алуучулар менен туристтердин коопсуздугун камсыздоону тапшырды. Бул тууралуу мамлекет башчынын маалымат катчысы Эрбол Султанбаев кабарлады.

Ички иштер министрлигине, Ысык-Көл облусундагы ыйгарым укуктуу өкүлүнө эс алуучулар менен туристтердин коопсуздугун камсыздоо боюнча профилактикалык иш-чараларды күчөтүү, суу транспортунун ишмердигин тартипке салууга өзгөчө көңүл буруу тапшырмасы коюулду.

23-июлда саат 16:30 чамасында Чолпон-Ата шаарында эс алуучу жайлардын биринде суу оюн-зоок кызматын көрсөткөн моторлуу кайыктын айдоочусу көлдүн үстүндө балон сүйрөтүп бара жатып, теплоходго урунган. Натыйжада үч адам денесинен жараат алып, оор абалда Чолпон-Ата шаарынын райондук ооруканасына жеткирилген.

Жабыркаган үч адамдын экөөсү оорукананын жандандыруу бөлүмүндө көз жумуп, үчүнчү жабырлануучу хирургия бөлүмүнө жаткырылган.

Ысык-Көл РИИБнин кызматкерлери тарабынан кылмышка шектүү кармалып, алдын ала суракта ал өз күнөөсүн мойнуна алган.

Учурда тийиштүү соттук медициналык экспертизалар дайындалып, тергөөгө чейинки текшерүү иштери улантылууда.