Чуңкурчакта Байтик баатырдын 200 жылдык мааракеси өттү (сүрөт)

Бүгүн, 31-августта, Чүй облусунун Аламүдүн районундагы Чуңкурчак жайлоосунда көрүнүктүү саясий ишмер Байтик Канай уулунун (Байтик баатыр) 200 жылдык мааракесине карата салтанаттуу иш-чаралар өткөрүлдү.

Масштабдуу иш-чарага республиканын бардык аймактарынан коноктор чакырылган.

Иш-чаранын алкагында 1,5 миллион сомдук байге фонду менен жети багыт боюнча “Ынтымак” фестивалы өткөрүлдү.

Катышуучулар улуттук кийимдерди, тамак-аштарды, бийлерди тартуулашты, ылдамдыкка боз үй тигүү жана аны жасалгалоо жана башка сынактар өткөрүлдү.

Салтанат өлкөнүн бардык облустарынан келген чыгармачыл жамааттар тарабынан даярдалган ыр-күү жана төкмө акындардын өнөрлөрү менен коштолду.

Мындан тышкары, көп сандаган көрүүчүлөргө Байтик Канай уулунун (Байтик баатыр) төрөлүшү, анын түндүк кыргыздардын жол башчысы катары калыптанышы жана эгемендик үчүн күрөшү тууралуу театрлаштырылган пролог көрсөтүлдү.

Концерттик программадан соң 89 күлүк катышкан 31 чакырымдык ат чабыштын жеңүүчүлөрүн сыйлоо аземи болду.

Президент Садыр Жапаров жеңүүчүлөргө сыйлыктарды тапшырды. Ат чабыштын жеңүүчүсү байге катары борбор калаадан бир бөлмөлүү батир алса, калгандарына акчалай сыйлыктар тапшырылды.