Дүйнө Кубогу: Кыргызстандык балбан Исламбек Орозбеков коло медаль утту

Сербияда өтүп жаткан күрөш боюнча Дүйнө Кубогунда кыргызстандык балбан Исламбек Орозбеков коло медаль утту. Бул тууралуу Дүйнөлүк Күрөш Уюмунун сайтына жарыяланды.

70 кг салмакта күрөшкөн Орозбеков 1/8 финалда албаниялык балбанды, чейрек финалда индиялык балбанды жеңип, жарым финалда түркиялык балбанга утулуп калды. Үчүнчү орун — коло медаль үчүн күрөштө Орозбеков азербайжандык Гитиномагомед Гаджиев менен бет келип, аны 6:5 эсебинде жеңип алды.

Муну менен Кыргызстандын байге куржунуна 3 алтын, 4 коло — 7 медаль түшүп, Дүйнө Кубогуна катышып жаткан өлкөлөр арасында экинчи орунду ээледи.

• Грек-рим күрөшү боюнча Жоломан Шаршенбеков — алтын медаль;
• Кыз-келиндер арасында эркин күрөш боюнча Айсулуу Тыныбекова жана Мээрим Жуманазарова — алтын медаль;
• Грек-рим күрөшү боюнча Калы Сулайманов, Руслан Царев — коло медаль;
• Кыз-келиндер арасында эркин күрөш боюнча Айпери Медет кызы — коло медаль;
• Эркектер арасында эркин күрөш боюнча Айаал Лазарев коло медаль алды.