Бишкек: «Тазалыктын» кызматкерлерине кылмыш иши козголду

Бишкек шаарынын мэриясынын «Тазалык» ишканасында текшерүү жүргүзүлүп, кылмыш иши козголду. Бул тууралуу Башкы прокуратуранын басма сөз кызматы кабарлады.

Маалыматка караганда, «Тазалыктын» айрым кызматкерлери 7 млн 179 миң сомдук 134,2 тонна күйүүчү-майлоочу майды мыйзамсыз короткону аныкталган.

2022-2024-жылдарда мыйзамсыз буйруктарды чыгарып, ишкананын айрым кызматчылары менен жеке автоунааларын кызматтык максатта пайдалануу жөнүндө келишимдерди түзүп алышып, күйүүчү-майлоочу майларды өздөрүнүн жана башка кызматчылардын жеке кызыкчылыктарына колдонуп келишкен.

Текшерүүнүн жыйынтыгы менен шаардык прокуратура тарабынан Кылмыш-жаза кодексинин 337-беренеси (Кызмат абалын кыянаттык менен пайдалануу) жана 210-беренеси (Ишенип берилген мүлктү ыйгарып алуу же коротуу) боюнча кылмыш иши козголуп, тергөө амалдары башталды.