Президент Жапаров гимнди өзгөртүү боюнча пикирин айтты

Президент Садыр Жапаров коомчулукта кызуу талкууланып жаткан гимнди өзгөртүү маселеси боюнча «Кабар» улуттук агенттигине комментарий берип, гимнди өзгөртүүнү колдой турганын айтты.

Ал Кыргызстан өз алдынча мамлекет экенин, элдин 5 миң жылдык тарыхы бар экенин даңазалаган гимн жазып койгонду туура көрөт. Азыркы гимн архив болуп кала берерин кошумчалады.

Президент гимн дароо өзгөрбөй турганын, чыгармачыл адамдар тарабынан жазылып, элдин талкуусуна коюларын билдирди.

«Гимнди чыгармачыл адамдар, композиторлор, акындар жазып, элге салыш керек. Көпчүлүк эл колдогон гимнди кабыл алсак жаман болбойт. Гимнди окуучулардан баштап ак сакал ата-апаларыбызга чейин ырдап турса кандай сонун. Керек болсо той-концерттерде ырдалып турса эмнеси жаман. Гимндин мазмуну мамлекетибизди даңазалоо, жарандарыбызды мекенчилдикке, биримдикке, ынтымакка чакыруу, мамлекетибизди түбөлүккө сактап калалы деген ураандар болуш керек. Өмүр бою эле азаттыкка чыктык деп жүрө беребизби?», — деди өлкө башчы.

Садыр Жапаров ошондой эле  кээ бир саясатчылардын гимн боюнча айткан пикирине да жооп берди.

«Адахан байкуш алжып калган. Ага көңүл бурбай эле койгула. Ал бүгүн өзүнүн айтканына эртең каршы чыга берет. Учурдагы кырдаалга карата пикирин жана позициясын өзгөртүп кете берген адамдарды мамлекетчил адам деп айтууга болбойт. Андай адамдар өзүмчүл болушат. Мен эле болушум керек, менден башка эч ким эмес дешет».

Жогорку Кеңештин төрагасы Нурланбек Шакиев Кыргызстандын гимни өзгөрүшү керектиги тууралуу 25-октябрда парламентте Кара-Кыргыз автоном облусунун түзүлгөнүнүн 100 жылдыгына жана мамлекеттик ишмер Иманалы Айдарбековдун 140 жылдыгына арналган иш-чарада сүйлөп жатып айткан.

Шакиевдин гимнди өзгөртүү тууралуу айтканы тартылган видеосу социалдык тармактарга жарыяланды.

«Биз гимнди өзгөртөбүз. Себеби, гимнди кабыл алганда Советтер Союзунан чыккан убак болгон. Азыр биз бутуна толук турган, кадыресе өнүгүү жолуна түшкөн мамлекетпиз. Ошол үчүн биз гимнди өзгөртүшүбүз керек. Бардык кыргыз эли ырдай турган гимн болушу керек», — деп Шакиевдин айтканын аталган видеодон көрүүгө болот.

Нурланбек Шакиевдин билдирүүсүнөн кийин президенттин басма сөз катчысы Аскат Алагөзов мамлекеттик гимн өзгөртүлөт деп дүрбөлөңгө түшүүгө негиз жок экендигин айткан.

Ал парламенттин төрагасы Нурланбек Шакиевдин мамлекеттик гимнди өзгөртүү тууралуу айткан сөзүн анын жеке пикири катары кабыл алуу керектигин белгилеген.

Кыргызстандын гимни 1992-жылы 18-декабрда бекитилген. Анын сөзүн Жалил Садыков менен Шабданбек Кулуев, обонун Насыр Давлесов менен Калый Молдобасанов жазган.