Жалал-Абаддагы балдар ооруканасына жаңы имарат салынды

Бүгүн, 3-мартта Жалал-Абад шаарындагы балдар ооруканасынын жаңы имаратынын ачылыш салтанаты өттү. Бул тууралуу Саламаттыкты сактоо министрлиги билдирди.

Аземге министр Алымкадыр Бейшеналиев, Жалал-Абад облусунун, шаарынын жетекчилери катышты.

«Бүгүн биз облустук балдар ооруканасынын ачылышына күбө болуп отурабыз. Жалал-Абад облусунда 1 миллион 300 миң адам жашаса, алардын 48 миң 786сы 14 жашка чейинки балдар. Бул заманбап имарат жана жабдуулар балдарга медициналык кызмат көрсөтүүнүн сапатын жогорулатууга жардам берерине  ишенем», — деди министр.

Балдар ооруканасынын жаңы имараты 2022-жылы салына баштаган. Курулуш иштерин «Ассанабил» коомдук кайрымдуулук фонду каржылаган.

Имаратта 25 орундуу хирургиялык бөлүм, 20 орундуу травматологиялык бөлүм жана жеңил дартка чалдыккан балдарды караган бөлүм бар.