Ош шаарында кемпирин бычактап салган абышка кармалды

Ош шаарынын Калинин конушунан 58 жаштагы аял төрт жеринен бычак жеп, оор абалда облустук ооруканага түшкөн. Аны коңшулары алып келишкен.

Ош шаардык ички иштер башкармалыгы Кылмыш-жаза кодексинин 122-беренеси (адам өлтүрүү) менен иш козгоп, бул ишке шектүү катары аялдын 1959-жылы туулган С.Х. аттуу абышкасын кармашкан.

Милициянын берген маалыматына таянып айтсак, окуя 7-апрелде болгон. Абышка кемпири менен чатакташа кетип, ашкана бычагы менен көкүрөк тушка төрт жолу сайып жиберген. Ызы-чууну уккан коңшулары арача түшүп, экөөнү ажыратып, аялды оор абалда ооруканага жеткиришкен.

Шектүү С.Х. Ош шаардык ички иштер башкармалыгынын убактылуу кармоочу жайына киргизилген. 9-апрелде шаардык сот тергөө бүткөнчө абакта кармоо чечимин чыгарган.

Учурда тергөө жүрүп жатат.