Бишкекте Финансы-экономика техникумунун жатаканасынан өрт чыкты

Бишкек шаарынын Жаш Гвардия бульварында жайгашкан Финансы-экономика техникумунун жатаканасынан өрт чыкты. Бул тууралуу Өзгөчө кырдаалдар министрлигинин басма сөз кызматы билдирди.

Өрт 3-кабаттан чыккан. Тилсиз жоо саат 14:29да чектөөгө алынып, саат 15:26да толук өчүрүлгөн.

Алдын ала маалыматтарга караганда, эки адам түтүнгө уугуп, эки адам бутунан жаракат алган. Аларга тиешелүү медициналык жардам көрсөтүлгөн.

Андан тышкары куткаруучулар ичинде калган эки аялды жана эки жаштагы бир кызды чыгарып кетишкен.

Учурда өрттүн себеби такталып, келтирилген чыгым эсептелип жатат.