Кочкор районунда Турдакун Усубалиевдин айкели тургузулду

Кочкор районунун борборуна Кыргызстанды 25 жыл жетектеген мамлекеттик ишмер Турдакун Усубалиевдин айкели тургузулду.

Айкелдин ачылыш салтанаты бүгүн, 11-мартта өтүп, ага президент Садыр Жапаров да катышып, куттуктоо сөзүн сүйлөдү.

Акимиаттын астына айкел орнотуу демилгесин аким Курбанбек Камчиев көтөрүп, жеке ишкерлердин демөөрчүлүгү менен ишке ашкан.

Турдакун Усубалиев 1919-жылы Кочкор районунун Теңдик айылында туулган. 1961-жылдан 1985-жылга чейин Кыргызстан Компартиясынын Борбордук Комитетинин биринчи катчысы, өлкө башчысы кызматын аркалаган. Ал жетектеп турган жылдарда Кыргызстанда бардык тармак, айрыкча, өнөр жай, айыл чарба, маданият, билим берүү тармагы өзгөчө өнүккөн. Суудан энергетика алуу идеясы ишке ашып, Токтогул баштаган ири ГЭСтер курулган.

Турдакун Усубалиевди замандаштары «Бишкек шаарынын башкы архитектору» деп эскерип келишет.

1999-жылы Кыргыз Республикасынын Баатыры ардак наамы берилген.