Вакцинанын муздаткычын уруксатсыз ачып, видеого тарткан аял боюнча түшүндүрмө берилди

Бишкек шаарындагы №8 Үй-бүлөлүк дарыгерлер борборунда вакциналар эрежеге ылайык сакталууда. Бул тууралуу Саламаттыкты сактоо жана социалдык өнүктүрүү министрлиги билдирди.

Белгилей кетсек, белгисиз аял вакцина сакталып турган муздаткычтардын ичин тартып, алардын +17 градуста сакталып турганын айтканы социалдык тармактарга тараган.

Министрликтин маалыматына караганда, ал аял 7-августта Vero Cell (Синофарм) вакцинасынын биринчи дозасын алуу үчүн №8 Үй-бүлөлүк дарыгерлер борборуна келген. Эмдөөдөн кийинки 30 мүнөттүк байкоо учурунда медкызматкерлердин эскертүүсүнө баш ийбей, муздаткычтарды ачып, видеого тартып кирген.

Видеодо айтылган +17 градуста сакталып турат деген маалымат калп экенин, ал видеого тартып жаткан убакта муздаткычтын ички температурасы +1,7 градусту көрсөткөнүн, видеону жакшылап караган адамга ал жердеги термометрде +5 градуска чейин гана көрсөтүлүп турганын айтат аталган борбордун директору Анара Шакеева.

Бирок ага карабастан, атайын комиссия түзүлүп, текшерүү жүргүзүлгөн. Натыйжада аталган борбордогу муздатуу чынжыры бузулбаганы аныкталган.