Өкмөт кумшекер менен өсүмдүк майын экспорттоого тыюу салды

Өкмөт кумшекер жана өсүмдүк майын экспорттоого тыюу салды. Бул тууралуу Өкмөт үйүндөгү брифингде Айыл, суу чарба жана аймактарды өнүктүрүү министри Аскарбек Жаныбеков билдирди.

2020-жылдагы статистикалык маалымат боюнча, кумшекердин 56%ын ата мекендик компаниялар өндүрөт, калган 44%ы коңшу өлкөлөрдөн импорттолот. Орусия, Казакстан жана Тажикстанда кумшекердин кымбатташы Кыргызстанга да таасирин тийгизгени байкалууда.

«Азыркы учурда өлкөдө эң керектүү азыктардын тартыштыгына жол бербөө жана алардын баасын түшүрүү үчүн премьер-министр токтомго кол койду, ага ылайык, өлкөдөн кумшекер жана өсүмдүк майын экспорттоого тыюу салынат», — деди Жаныбеков.

Министр белгилегендей, азыркы учурда эң зарыл болгон азык-түлүктүн жетишсиздиги байкалбайт, мындай чара аргасыздан жана убактылуу болуп саналат.