Жапаров: Кыргызстанды кубаттуу өлкөгө айлантууну кыялданам

Жаңы шайланган президент Садыр Жапаров ант берүү аземинде Кыргызстандын кубаттуу өлкөгө айлантууну кыялдана тургандыгын билдирди.

Өз сөзүндө Жапаров аталган аруу тилекти ишке ашыруу боюнча пландары президенттик программасында да камтылганын белгиледи.

— Элимдин ар бир патриот уул-кызы кыялдангандай эле, мен да Кыргызстандын экономикалык жактан ыкчам өнүккөн, адам укугу урматталган, мыйзам үстөмдүгүнө умтулган, жаштары келечекке оптимизм менен караган, эркин жана кубаттуу өлкөгө айланышын кыялданамын, — деди мамлекет башчысы Садыр Жапаров.

Ошондой эле ал коомчулукту, өлкөдөгү бардык күчтөрдү: санаалаштарын, атаандаштарын, улуттук азчылыктарды жана диний топторду ынтымакка чакырды.