Салык төлөөчүлөргө бир катар жеңилдиктер каралды

Мамлекеттик салык кызматы салыктарды, санкцияларды, айып пулдарды төлөөнү жеңилдетүү боюнча бир катар шарттарды иштеп чыкканын кабарлап, салык төлөөчүлөрдү жана карызкорлорду аталган жеңилдиктен пайдаланып калууга чакырды.

Маалым болгондой, 2020-жылдын 14-августунда кабыл алынган «Кошуп эсептелген пайыздар, туумдар, салыктык санкциялар боюнча карыздарды, камсыздандыруу төгүмдөрү боюнча айып пулдарды кайра түзүмдөштүрүү жөнүндө» Мыйзамга ылайык, салыктарды, туумдарды, айып пулдарды төлөөнү 2021-жылдын 31-декабрына чейин узартты. Эми салык төлөөчүлөр жана карызкорлор 2020-жылдын 1-июлуна чейин түзүлгөн төгүмдөрүн 2021-жылдын 1-июлуна чейин төлөсө, 100 пайыздык жеңилдик, 2021-жылдын 31-декабрына чейин төлөсө, 50 пайыздык жеңилдик ала алышат.

Салыктар жана камсыздандыруу төгүмдөрү боюнча карыздарды реструктуризациялоо үчүн катталган жери боюнча салык органына кайрылуу зарыл.

Белгилей кетсек, аталган өнөктүк салык төлөөчүлөрдүн каржылык-экономикалык абалын турукташтырууга жана колдоого алууга мүмкүндүк берет.

Кеңири маалыматты 116 номери же www.sti.gov.kg сайты аркылуу алууга болот.