Жарандык активисттер мекемеде системалуу маселелер бар экенин билдирип жатышат. Өз кезегинде бийлик бул иш боюнча объективдүү иликтөө жүргүзүүгө убада берүүдө. Бул тууралуу centralasian.org жазды.
Ага ылайык, учурда «Көрсөтмө берүүгө мажбурлоо» беренеси боюнча айыпталган бир тергөөчү кармалганы кабарланууда.
ИИМ имаратынын алдындагы бош мектеп партасы – жарандык активисттер тарабынан уюштурулган үнсүз перформанс. Алар 10-класстын окуучусу Лука Сирадзенин өлүмү үчүн укук коргоо органдарына жоопкерчилик жүктөшүүдө. Тергөөчүгө сурак берип чыккандан кийин 15теги өспүрүм тогузунчу кабаттан боюн таштаган. Дарыгерлер бир жума бою анын өмүрү үчүн күрөшүп, бирок 17-декабрда ал көз жумду.
Лука Сирадзе бөтөн бирөөнүн мүлкүнө зыян келтирүү иши боюнча күбө катары сурак берген. Декабрдын башына жеке мектептердин биринде дубалдарга ар түрдүү жазууларды жазып кетишкен. Луканын бул мектепте окугандыгы жана окуя болгон учурда видеокөзөмөл камерасына түшүп калганы айтылган.
Маркумдун жакындарынын адвокаты Реваз Ачарадзенин айтымында, бул иштин алкагында бери дегенде үч полиция кызматкеринин күнөөлүү экени аныкталууда. Мындан тышкары күбө катары сурак берип чыккан дагы бир өспүрүм өз өмүрүн кыюуга аракет жасаган.
Өспүрүмдүн өлүмү Грузияда өкмөткө каршы жаңы толкундоолорго жол ачты. Жеке мектептин дубалындагы жазуулар эми полиция бөлүмдөрүндө, үйлөрдө, жолдордо пайда болду. Жарандык активисттер, өкмөттүк эмес уюмдар бул иш аягына чейин калыс тергелбесе, жапырт түрдө митингге чыгышарын билдиришүүдө.
