Парламент экс-президенттердин кол тийбестигин алып салууну колдоду

«Кыргыз Республикасынын Президентинин ишмердигинин кепилдиктери тууралуу мыйзамына өзгөртүүлөрдү киргизүү жөнүндө” мыйзам долбоору каралып, үчүнчү окууда жактырылды. Бул тууралуу Жогорку Кеңештин  басма сөз кызматы билдирди.

Мыйзам долбоорунун демилгечилери: Жогорку Кеӊештин депутаттары Курманкул Зулушев жана Исхак Масалиев.

Жаңы Конституцияда президент адам укуктарынын жана эркиндиктеринин кепилдиги катары саналбайт. Үй-бүлөсүн мамлекет камсыздайт деген ченем да жок.

Ошондой эле, экс-президенттер өзүнүн ыйгарым укуктарын аткарган мезгилде кылмыш жасап, соттун өкүмү күчүнө кире турган болсо, аларга каралган бардык мамлекеттик артыкчылыктар жокко чыгарылат.

Мыйзамга төмөндөгүдөй өзгөртүүлөр киргизилет:

— Президенттин кол тийбестигинин деңгээлинин төмөндөгөндүгүн эске алуу менен, 3-берене жаңы редакцияда баяндалууда, анда Президенттин кызмат ордунан четтетилгенден кийин, аны кылмыш жоопкерчилигине тартуу мүмкүнчүлүгү бөлүгүндө Конституциянын ченемдери чагылдырылды;

— Аны менен чогуу жашап турган Президенттин үй-бүлө мүчөлөрү тийиштүү артыкчылыктар жана жеңилдиктерди пайдаланарын эске алуу менен Мыйзамдын 6-беренеси Президенттин үй-бүлө мүчөлөрүнүн чөйрөсүн белгилеген норма менен толукталды;

— 13-беренеде экс-президентке карата соттун айыптоо өкүмү күчүнө кирген учурда, ушул беренеде каралган бардык кепилдиктер токтотулат;

— Мыйзамдын 18-беренеси күчүн жоготту деп таануу сунуш кылынууда. Мындан аркы ар-намысын жана кадыр-баркын коргоо экс-президенттин өзүнө жүктөлөт.