Журналисттик иликтөөлөр фонду грант алууга сынак жарыялады

Иликтөөчү журналисттер, медиа тармагында иш алып барган уюмдар, фрилансерлер, жарандык активисттер, блоггерлер, студенттер жана башка кызыктар адамдар Журналисттик иликтөөлөр фондунан чакан грант алууга өтүнмө бере алышат.

Гранттардын максаты – Кыргызстанда иликтөө журналистикасын өнүктүрүү, иликтөө жүргүзгөндөргө каржылык, адистик жардам көрсөтүү болуп эсептелет.

Гранттын өлчөмү – 70 миң сом. Анын эсебинен транспорт чыгымы, жабдыктардын ижарасы, документтерди чогултуудагы чыгымдар жабылат. Каражаттын жарымы өтүнмө канааттандырылганда төлөнөт, калганы – иликтөө аяктаганда.

Өтүнмөлөр кыргыз же орус тилинде кабыл алынат. Анда иликтөөнүн темасы, иликтөө жүргүзүүнүн жолдору көрсөтүлүп, долбоордун бюджети берилиши керек. Иликтөөлөр ар башка форматта болушу мүмкүн (ТВ, радио, он-лайн, басма).

Өтүнмөлөр 2018-жылдын 25-ноябрына чейин grant@jif.kg дарегине жиберилиши керек.