«Урааным Манас» сынагы өлкө боюнча токтотулду

«Урааным Манас» кароо-сынагы республика боюнча токтотулду.

Билим берүү жана илим министрлигинин маалыматына караганда, билим берүү министри Догдуркүл Кендирбаева саламаттык Сактоо министри Алымкадыр Бейшеналиев менен Сузак районунда автокырсыктан жабыркаган балдардан Жалал-Абад облустук балдар клиникасына 3-майда түндө барып кабар алды.

Бул окуяга байланыштуу окуучулардын катышуусу менен өтүп жаткан «Урааным Манас» кароо-сынагы республика боюнча токтотулду.

Министрлик медициналык уюмдар жана бардык тараптар менен кызматташып, балдар менен алардын үй-бүлөлөрүнө толук колдоо көрсөтөт.

«Мындан тышкары Жогорку окуу жайлардын психолог педагогдору тартылып, жеринде балдар жана ата-энелер үчүн күн-түнү тамак ашы, жатаканасы менен убактылуу кризистик борбор уюштурат», — деп айтылат маалыматта.

Эскерте кетсек, 2-майда саат 11:30дар чамасында Сузак районунун Көк-Арт айыл өкмөтүнүн Катмы эс алуучу жайында манас айтуу боюнча республикалык кароо-сынактын алкагында флешмобго катышып жаткан окуучуларды Hyundai Porter унаасы белгисиз себептерден токтоп турган жеринен жылып, окуучуларды тебелеп кеткен. Анын натыйжасында 32 адам ар кандай жаракат алган.