Сот мындай чечимин Трамптын 2021-жылдын 6-январындагы окуяга катыштыгы менен негиздеди. Анда анын тарапташтары Жо Байден жеңишке жеткен шайлоонун жыйынтыгын тастыктоону үзгүлтүккө учуратуу максатында Конгресстин имаратына чабуул жасашкан.
Соттун бул чечими Колорадо штатындагы шайлоочулар тобунун Дональд Трамп Конституцияга ылайык, президенттик шайлоого катышууга укугу жоктугун белгилеген доо арызына жооп болду. Анда өкмөткө каршы чыккан мамлекеттик жетекчи АКШга да каршы козголоңго катышса, ал федералдык штаттык деңгээлде мамлекеттик кызматты ээлей албасы жазылган.
Колорадо штатынын төмөнкү инстанциядагы соту бул арызды Конституциядагы аталган тыюу президентке да тиешелүү экени так көрсөтүлбөгөнү менен четке каккан. Жогорку сот Конституцияны мындай чечмелөөгө макул болгон жок. Ал козголоңго Дональд Трамптын тиешеси бар деген тыянакка келген жана конституциялык тыюу президенттикке талапкерлерге да тиешелүү экенин белгиледи.
«Президент Трамп бийликти тынч өткөрүп берүүнү үзгүлтүккө учуратууну көздөгөн зомбулукка жана мыйзамсыз акцияларга тукуруп, колдогон», – деп жазылган соттун чечиминде.
Трамптын шайлоо штабынын өкүлдөрү Колорадо штатынын бул чечимине апелляциялык арыз менен АКШнын Жогорку сотуна кайрылышат. Алар штаттын Жогорку сотунун чечимин Колорадонун шайлоочуларын өз талапкери үчүн добуш берүү мүмкүнчүлүгүнөн ажыратуу аракети жана шайлоо жараянына кийлигишүү деп баалашты.
Буга чейин эки штатта Дональд Трампты шайлоодон четтетүү аракети жергиликтүү соттор тарабынан четке кагылган. Колорадо штатынын Жогорку сотунун чечимин өлкөнүн Жогорку соту жокко чыгарбаса, Трамптын башка штаттардагы каршылаштары анын ысымын шайлоо бюллетенине киргизбөө мүмкүнчүлүгүнө ээ болушат. Дональд Трампка каршы ушундай эле доо арызды Мичиган штатынын Жогорку соту да карап жатат.
