«Манас» аэропортунан мыйзамсыз алып келинген дары-дармек табылды

«Манас» аэропортунан мыйзамсыз ташылган дары-дармек партиясы кармалды. Бул тууралуу Мамлекеттик бажы кызматы билдирди.

Маалым болгондой, «Манас» аэропортунун бажы кызматкерлери УКМК кызматкерлери менен бирге «Аэрофлот» компаниясынын каттамы аркылуу М.Т.Б. аттуу жарандын дарегине келген дары-дармек партиясын жүктөп бараткан Hyundai Porter унаасын токтотушкан.

Текшерүү учурунда унаадан 2495 таңгак 200 миллиграмдык «АЦЦ», 205 таңгак 0.6 миллиграмдык «Эноксапарин натрия Клексан-600 анти-Ха МЕ» инъекция үчүн эритме, 200 таңгак 0.6 миллиграммдык «Эноксопарин натрия — Клексан 4000 анти-Ха МЕ» инъекция үчүн эритме табылган.

Кармалган дарылардын брутто-салмагы коштомо кагазда 298 килограмм деп көрсөтүлгөн, бирок кайра таразага тартканда 400 килограмм болуп чыкты.

Бул факт Кылмыштардын жана жоруктардын бирдиктүү реестрине катталып, материалдар тергөө кызматына өткөрүлүп берилди.