Баткен: Прокурордун өлүмүнө шектелген жаран эки айга камалды

Баткен облусунун прокурорун өлтүрүүгө шектелген жаранга карата кылмыш иши козголуп, ал эки айга камалды. Бул тууралуу облустук милициядан кабарлашты.

Маалымат боюнча, 17-ноябрда кечки саат 22.00 чамасында Баткенде Lexus-470 унаасы табылып, аны текшерүүдө кандын изи табылган. 18-ноябрдын таңында Баткен облусунун прокурору Анарбай Мамажакыповдун денеси табылган.

Буга чейин Баткен облусунун прокурору Анарбай Мамажакыповдун өлүмүнө байланыштуу облустук капиталдык курулуш башкармалыгынын жетекчиси сурак берип жатканы кабарланган. Соттук-медициналык экспертиза дайындалып, тергөө амалдары жүрүүдө. Кылмыш-жаза кодексинин «Адам өлтүрүү» (97-беренеси) менен иш козголду.

Башкы прокурор Өткүрбек Жамшитов Баткен облусуна барып, прокуратуранын жамааты менен жабык жыйын өткөрдү.