Президент Түп районунун тургундары менен жолугушту

Президент Садыр Жапаров бүгүн, 21-августта, Ысык-Көл облусуна иш сапарынын алкагында Түп районунун тургундарын 200 жумуш орду менен камсыздаган тигүү фабрикасын көрүп чыкты.

Мамлекет башчысы  андагы иштөө шарттары, иш орундарынын тартиби, өндүрүш техникаларынын абалы менен таанышты.

Түп айылындагы ишкана «Салкын» ЖЧКсы Кыргызстандагы пахта продукциясын өндүргөн эң ири фабриканын филиалы болуп саналат. Ал токулган кездеме, байпак жана башка продукцияларды чыгарат.

Жергиликтүү тургундар жана фабриканын кызматкерлери менен баарлашуу учурунда президент, буга чейин «Ысык-Көл облусун өнүктүрүү фондунун» каражаттары ар кыл деңгээлде коррупциялык учурлар болуп, максатсыз пайдаланылганын, натыйжада көптөгөн жакшы регионалдык долбоорлор ишке ашпай калганын белгиледи.

Садыр Жапаров Түп айылында бүгүн ачылган 200 орундуу фабриканын мисалында эми Фонддун бардык каражаттары аймактагы ишкерлердин демилгелерин колдоого ачык-айкын бөлүштүрүлөрүн белгиледи.

Жергиликтүү тургундар Мамлекет башчысы менен баарлашууда айылдарды таза суу менен камсыз кылуу, жер тилкелерин трансформациялоо, ошондой эле мектеп жана бала бакчаларды куруу маселелерин көтөрүштү.

Президент Садыр Жапаров жергиликтүү өз алдынча башкаруу органдарынын, өзгөчө акимдердин ролун күчөтүү, жөлөк пул жана бюджеттик чөйрөдөгү кызматкерлердин айлык акыларын жогорулатуу пландары жөнүндө айтып берди.