Чек ара: Көк-Ташта түндө дагы ок атышуу болду

Баткен районунун Тажикстанга чектеш Көк-Таш айылында 11-январга караган түнү дагы ок атышуу болду. Бул тууралуу «Маралга» окуя болгон жерге жакын жашаган айыл тургуну Абдумиталип Кумарбаев билдирди. Окуя Жака-Өрүк участкасынан өтүп бараткан Кыргызстандык жүк ташуучу унааны тажик тургундары таш менен ургандан кийин башталган.

— Дагы кечээкидей ок атышуу болду. Кыргыздарда курмандыктар, ок тийип, жаракат алгандар жок. Ок атуу түнкүсүн саат бирлерде башталды. Тажиктер биринчи болуп ок чыгарышты. Дээрлик 2-3 сааттай маал-маалы менен атышуу болуп турду. Биз айылдагылар түнү бою күзөттө болдук. Чыр Исфанадан Бишкекке бараткан оор жүк ташуучу унаага тажиктер таш ургандан кийин башталган, — деди айыл тургуну Абдумиталип Кумарбаев.

Эске сала кетсек, кечээ чек арадагы айылда тажик-кыргыз элинин ортосунда тирешүү болуп, тажик тургундары ок атуучу куралдан ок чыгарышкан. Окуя 10-январга караган түнү башталып, таңкы сааттарга чейин уланган.

Окуяга байланыштуу Тажикстандын расмий өкүлдөрү да чагымчылдыкка барып жатканын Кыргызстандын чек ара кызматы белгилеп, аларды бейтарап болууга чакырган.