Кызыл-Кыяда төрт баланы сабаган 12 өспүрүм кармалды

Соцтармактардагы Кызыл-Кыя шаарында белгисиз балдардын топ болуп мушташкан видеосу боюнча Баткен облустук милициясынын басма сөз кызматы маалымат берди.

23-ноябрь күнү саат 23:30 чамасында Кызыл-Кыя шаарындагы “Таштемир ажы” базарынын батыш тарабында Ноокат районунун Кулатов айыл аймагынын 17 жаштагы төрт өспүрүм бара жатканда алдынан аларга бейтааныш балдар чыгып, аларды себепсиз урушкан.

Бул фактынын негизинде Кылмыш жаза кодексинин 280-беренеси (Бейбаштык) менен сотко чейинки тергөө иштери башталып, жараат алган балдардын ата-энелеринен арыздар алынып, балдарга тиешелүү экспертизалар дайындалган.

Кызыл-Кыя ШИИБнин кызматкерлери тарабынан ыкчам иликтөө иштеринин жүрүшүндө белгисиз болгон балдар аныкталып, учурда Кызыл-Кыя шаарынын 12 тургуну (жашы жете элек) такталды.

Учурда кармалган балдар ата-энелеринин катышуусунда суракка алынып, ыкчам иликтөө иштери уланууда.