10 айда 53 миң жаранга укуктук-социалдык жардам берилди

Кыргызстанда 10 айда дээрлик 53 миң жаранга укуктук жана социалдык жардам берилди. Ал эми өткөн жылдын ушул мезгилинде бул көрсөткүч 64 миң 312ни түзгөн. Юстиция министри Аяз Баетов билдиргендей, быйыл жүргүзүлгөн экспертизалардын жана иштелип чыккан ченемдик-укуктук актылардын саны 3 миң 938ди түзгөн. Ал эми эксплуатацияга берилген же пландалган жайлардын саны 6га жетти. Министр мындан тышкары бул аралыкта дагы кандай иштер аткарылганын маалымдады.

Быйыл Юстиция министрлиги мыйзам долбоорлоо, экспертиза жана тармактык саясатты координациялоо чөйрөсүндөгү кызматтарды ишке ашыруу боюнча активдүү иш алып барганын министр Аяз Баевтов билдирди.

Өлкөдө жыл башынан бери 52 миң 811 жаранга укуктук жана социалдык жардам берилди.

Министрдин айтымында, быйылкы жылдын 10 айында жүргүзүлгөн экспертизалардын жана иштелип чыккан ченемдик-укуктук актылардын саны 3 миң 938ди түзгөн.

Баетов мындан тышкары бул аралыкта төмөндөгүдөй иш-аракеттер аткарылганын айтып берди.

«Берилген мамлекеттик кызмат көрсөтүүлөрдүн жана берилген нотариалдык иш-аракеттердин саны — 101 млн 686 миң 964 (2022-жылы — 2 млн 55 миң 11). Эксплуатацияга берилген, же пландалган объектилердин саны — 6 (2022-жылы — 5), Ишке киргизилген жана модернизацияланган автоматтык маалыматтык (АМС) системалардын саны — 9 (2022-жылы — 3), ишти жүргүзүүдөн келип түшүүлөрдүн көлөмү — 271 млн 917 миң сомду түздү (2022-жылы — 275 млн сом). Укуктук маалыматтардын борбордук базасына киргизилген актылардын саны — 14 миң 935 (2022-жылы — 12 миң 484). Министрликтин катышуусунда ченемдик-укуктук актылардын саны — 84, анын ичинен 29у кабыл алынды, 54ү иштелип чыккан, же илгерилетүү баскычында турат, бирөөсү чакыртып алынган».

Министр Баетов быйыл президенттин Жарлыгы менен Укуктук саясат концепциясы иштелип чыгып, бекитилгенин маалымдады.

Айтуусунда, бул концепция укуктук системаны өнүктүрүүнүн негизги багыттарын жана ишке ашыруунун формаларын аныктоого багытталган. Ошондой эле ага ченем чыгарууда ырааттуулук, мониторинг жана ченемдик-укуктук актылардын натыйжалуулугун баалоо кирет.

«Жазык-аткаруу тутумунда жаңы СИЗОлорду жана түзөтүү колонияларын куруу башталды. Айрым мекемелерди көчүрүү иштери жүргүзүлдү, үч ИНС мекемесинде жаңы объектилер ишке киргизилди. Ошондой эле 2023-жылы нотариалдык системаны түп тамырынан реформалоо башталган. Нотариат жөнүндө жаңы мыйзам кабыл алынып, нотариалдык аракеттерге монополияны жоюп, өзүн-өзү жөнгө салууну киргизди. Улуттук бирдиктүү нотариалдык палата түзүлдү. Маанилүү өзгөрүүлөр адвокаттык кесипке да таасирин тийгизип, өзүн өзү жөнгө салууга жана талапкерлерди эффективдүү тандоого басым жасады».

Министрликтин маалыматына караганда быйыл нотариустар жана адвокаттар үчүн сынактын форматы өзгөртүлдү. Коррупциялык тобокелдик жогору болгон сынак этаптары алынып салынды. Эми бардык сынактар ​​онлайн режиминде көрсөтүлөт.

Мындан сырткары юридикалык жактарды каттоо чөйрөсүндө санариптик күбөлүктөр, ошондой эле юридикалык жактарды каттоо боюнча шашылыш кызматтар ишке киргизилди.

Жакын арада Кыргызстанда нотариустар аркылуу бардык маанилүү бүтүмдөр манжа издери менен жүргүзүлө баштайт.

Министр Аяз Баетовдун айтымында, министрлик ушул жылдын аягына чейин жаңы тартип боюнча нотариустардын ишин даярдоону бүтүрүүнү пландоодо.

«Нотариалдык иш-аракеттерди жасоо үчүн нотариустан манжа изин идентификациялоодон өтүп, бүтүмдү видеокамерага түшүрүү керек. Эми сиз тааныш нотариустар менен бүтүмдөрдү жүргүзүп, анан бир айдан кийин кол коё албайсыз. Айрыкча кыймылсыз мүлк менен операциялардын аткарылышына байланыштуу фактылар боюнча катуу көзөмөл болот. Кандайдыр бир деңгээлде бул татаалдашуу жана бюрократизация, бирок бул бизге керек. Эми маанилүү нотариалдык бүтүмдөр манжа издери аркылуу ишке ашырылат. Жаңы эреже соттордогу иштердин санын кыйла азайтат».

2024-жылы Юстиция министрлиги 2023-жылы башталган нотариалдык системанын, адвокатуранын жана юридикалык жактарды каттоонун натыйжалуулугун жогорулатууга багытталган реформаларды тереңдетүүнү пландаштырууда.

Укуктук саясат концепциясын ишке ашыруунун алкагында укуктун аткарылышын көзөмөлдөө жана мыйзамдардын натыйжасын баалоо механизмин иштеп чыгуу күтүлүүдө.

Ченемдик-укуктук актылардын долбоорлорун иштеп чыгуу, бекитүү жана кабыл алуу процесстерин автоматташтыруу пландаштырылууда.

2024-жылы дагы бир маанилүү багыт юридикалык жактардын нотариалдык документтерин жана каттоо иштерин санариптештирүү боюнча иштерди улантуу болот.