Үч айда алты жүздөн ашык кыргызстандык бекер юридикалык кеңеш алышты

112 ыкчам байланышы боюнча үч ай ичинде алты жүздөн ашык кыргызстандык бекер юридикалык консультацияларды алышты.  Анын ичинен Бишкек шаары боюнча — 417 адам, аймактар боюнча – 197 адам.

Кайрылгандардын ичинен ден соолугунун мүмкүнчүлүгү чектелген 19 жаран консультация алган.

Жарандар көбүнесе жарандык укуктук мамилелер, эмгек укугу, үй-бүлөлүк укуктук мамилелер, үй-бүлөлүк зомбулук, социалдык коргоо маселелери, документ алуу маселелери боюнча юристтен кеп-кеңеш алуу үчүн кайрылышкан.

Ошондой эле, мамлекеттин эсебинен квалификациялык юридикалык жардамга 56 адам муктаж болгондугу аныкталып, алар мамлекет тарабынан кепилденген Юридикалык жардамды координациялоо боюнча борборго жиберилген.

Кыргызстанда 2020-жылдын 1-майынан 31-июлуна чейин «Ыкчам байланыш» иштеп, анын негизинде юристтер БУУнун Өнүктүрүү Программасынын колдоосу менен ӨКМдин Бирдиктүү нөөмөттүк-диспетчердик кызматы 112 аркылуу консультацияларды көрсөтүп турду.

Мындай колдоо өлкөдө COVID -19 вирусунун жайылышына байланыштуу киргизилген «өзгөчө абал» жана «өзгөчө кырдаал» режими учурунда көрсөтүлгөн.