Бишкекте №19 жана №31 жаңы автобус каттамдары ишке кирет

Бишкекте жаңы №19 каттам ишке кирет. Бул тууралуу Бишкек мэриясына караштуу Транспорт жана жол-транспорт инфратүзүмдү өнүктүрүү департаментинин директорунун орун басары Нурбек Сагынбек уулу «Маралдын» түз эфиринде билдирди.

«№19 каттам жолго коюлду. Анын багыты экинчи автопарк жайгашкан Кустанай көчөсү менен Профсоюз көчөсүнүн кесилишиндеги аялдамадан башталат. Профсоюз көчөсү менен барып, Фучик — Чүй проспекти — Жаш гвардия бульвары – Лев Толстой – Э. Матыев көчөсү – А. Бакаев көчөсү – И. Ахунбаев менен Ак-Ордону көздөй кетет. Акыркы аялдамасы Ак-Ордо конушундагы Каркыра көчөсү менен Көк-Асаба көчөсүнүн кесилиши болот. Бул көчөлөрдө бир да коомдук транспорт жүрө элек болчу», — деди ал.

Ошондой эле Бишкек шаарында №31 каттам №101 маршруттук каттамдын ордуна ишке кирет. Ал Бишкек шаарынын борбордук бөлүгүндө шакекче кыймылында жүрөт. Ынтымак жаңы конушунан Д. Садырбаев көчөсү менен түшүп, Жайыл Баатыр – К. Тыналиев көчөсү – И. Ахунбаев көчөсү менен 7- апрель — Курманжан Датка — Жибек Жолу проспекти — Абдрахманов –Байтик Баатыр көчөсү менен кайра кайтып келет.

Ал: «№101 микроавтобустун каттамындагы кээ бир көчөлөр өзгөртүлдү», — деп кошумчалады.

Бишкек шаарында коомдук транспорттун кыймылын, жаңы багыттарын мэриянын коомдук транспорт департаменти аныктайт. Бүгүнкү күндө Бишкек шаарына 120 автобус келген. Алардын 50дөн ашыгы учурда каттамдарга коюлду.