Тажикстандын Ворух анклавын айланып өтүүчү Баткендеги Көк-Таш — Ак-Сай — Тамдык жолу 2022-жылы толугу менен бүткөрүлөт. Бул тууралуу Транспорт министрлиги маалымдады.
Министрликтин маалыматында, аталган жолдун узундугу долбоор боюнча 24.5 км түзөт. Бул долбоордун аткаруучусу «Жалал-Абад СМУтт» жабык акционердик коому. Алар жол курулушунун чыгымын 536 млн сомго баалаган. Курулуш иштери 2013-жылы апрель айында башталган. Бирок 2018-жылы жолдун 13-чакырымынан 17-чакырымына чейинки бөлүгү мамлекеттик чек арага жакын болгондуктан бүтпөй калган. Аталган участокто Ворух анклавынын тургундары менен Ак-Сай айылынын тургундары ортосунда бир канча ирет чыр чыккан. Буга тажик тараптын каршылыгы себеп болгонун министрликтин маалымат кызматы кошумчалаган.