Энергетика министри мунайдын баасын турукташтыруу жолун айтты

Дүйнөдө мунайдын баасы дагы 20 пайызга өсүүсү мүмкүн. Бул тууралуу Энергетика жана өнөр жай министри Кубанычбек Турдубаев Жогорку Кеңештин 24-марттагы жыйынында билдирди.

Анын айтымында, баанын өсүүсү Орусиядан ташылып келген мунайдын кымбат сатылышына байланыштуу болууда.

Январь айынан бери өлкөгө келген бензиндин баасы 7-10, ал эми дизелдики 3,2-4,8 сомго кымбаттаган. Ал эми жалпы өлкө боюнча алганда, орточо 3-4 пайызга өсүү байкалган.

«Буга биринчиден, дүйнө жүзү боюнча мунайдын кымбаттоосу себеп болууда. Дүйнөлүк ири фонддордун божомолдору боюнча мунайдын баасы дагы 20 пайызга өсүүсү мүмкүн. Өлкөдө мунун алдын алуу үчүн биз нефтини кайра иштетүүчү заводдорубузду толук кандуу иштетишибиз керек. Биздин заводдордун бир жылдык мүмкүнчүлүгү 2 млн 215 миң тоннага жетет. Жылдык керектөөбүз 1 млн 300 миң тоннаны түзөт», — деди министр.

Турдубаев учурда кайра иштетүү маселесинде чийки мунайды алууну чечүү керектигин, бул боюнча Казакстан, Өзбекстан өлкөлөрү менен сүйлөшүүлөр жүрүп жатканын билдирди.