Ажылыкты уюштурууну Муфтияттан алып салуу каралууда

Ажылык сыяктуу акча чогулткан иш-чараларды Муфтияттан бөлүү маселеси каралууда. Бул тууралуу Аалымдар кеңешинин мүчөсү, теология илимдеринин докторанты Марс Ибраев «Маралга» берген маегинде билдирди.

Анын баамында, акча болгон жерде чыр да болот.

Ажылыктын каражат чогултуу системасы өзгөрсө, Муфтият көбүрөөк сабатсыздыкты жоюу, имамдардын квалификациясын, диний билим берүү деңгээлин жогорулатуу жаатында иш алып бармак.

«Диний чөйрө кылдат каралышы керек. Сырттан саясий күчтөр аралашса, дин да саясатташып кетет. Өткөн окуялар жагымсыз жагдай жаратты, өкүнүү менен кабыл алып жатабыз. Анын зыянын жалпы диний адамдар көрдүк», — дейт Ибраев.

Мындан тышкары «Муфтият ажылык үчүн сүйлөшүүлөрдү жүргүзүү, квота маселесин карашы керек, ал эми уюштуруу жана техникалык иштерин жеке фирма же жаңы түзүлө турган уюм алып кетиши керек» деген сунуштар айтылып жатканын белгиледи.