Президент Садыр Жапаров Германиянын канцлери Олаф Шольцтун чакыруусу менен 29-сентябрда Берлин шаарында биринчи жолу өтө турган «Германия — Борбор Азия» саммитине катышат. Бул тууралуу Президенттин администрациясынын тышкы саясат бөлүмүнүн башчысы Муратбек Азымбакиев билдирди.
Анда Садыр Жапаров менен Олаф Шольц эки тараптуу сүйлөшүү өткөрөт, кыргыз-немис кызматташтыгынын актуалдуу маселелери, анын ичинде экономикалык алаканы кеңейтүүнү, экология жана климаттын өзгөрүшү талкууланат.
Сапардын алкагында Садыр Жапаровдун Германиянын президенти Франк-Вальтер Штайнмайер менен, ошондой эле «Германия экономикасынын Чыгыш комитети» немис ишкерлер ассоциациясынын мүчөлөрү менен жолугушары болжолдонууда.