Бүгүн, 8-июнда Жогорку Кеңештин жалпы жыйынында Министрлер кабинети сунуштаган «Жети-Өгүз районундагы Ак-Шыйрак тоо кыркасынын түндүк-батыш капталында жайгашкан № 354 аты жок мөңгүгө «шейх Заед бин Султан аль-Нахайян» географиялык аталышын ыйгаруу жөнүндө» мыйзам долбоору биринчи окууда каралды.
Долбоор боюнча баяндама жасаган Мамлекеттик кызмат жана жергиликтүү өз алдынча башкаруу иштери боюнча агенттиктин директорунун орун басары Мурат Байдылдаев атты ыйгаруу үчүн Жети-Өгүз районундагы Ак-Шыйрак айыл аймагынын тургундары менен макулдашуу болгонун, алар колдоп бергенин белгиледи. Ошондой эле бул демилге Кыргызстан менен БАЭнин кызматташтыгын мындан ары да бекемдөө максатында көтөрүлгөнүн билдирди.
Бир катар талаш-талкуулардан соң, долбоор добушка коюлуп, 67 депутат «макул» болуп, 5 депутат «каршы» чыкты.
Аны менен катар ушул эле топтомдо дагы бир Жети-Өгүз районундагы Ак-Шыйрак массивинде жайгашкан № 331 аты жок мөңгүгө «Король Абдулазиз» географиялык аталышын ыйгаруу жөнүндө» мыйзам долбоору да биринчи окууда колдоо тапты.