Талас шаарынын борбордук аянтына Айкөл Манастын айкели орнотулат. Бул тууралуу Президенттин Талас облусундагы өкүлчүлүгү билдирди.
Учурда алты метр айкелдин постаментин даярдоо иштери жүрүп жатат. Ачылыш салтанаты 21-март Нооруз майрамына белгиленген.
Айта кетсек, ишкер Темирлан Сарлыкбек уулунун каржылык колдоосу менен КР эл сүрөтчүсү, айкелчи Садабек Ажиев жана айкелчи Токталы Мурзакаримов чеккен айкелдин көчүрмөсү 2017-жылы Стамбул шаарынын Халич аймагына орнотулуп, ошол жылдын 9-августунда өткөн ачылыш салтанатына Кыргызстандын ошол кездеги президенти Сооронбай Жээнбеков да катышкан. Ушул эле эмгектин дагы бир үлгүсү Кыргызстандын эгемендигинин 30 жылдыгына карата 2021-жылы Анкара шаарынын Кечиөрен аймагына да коюлган.
Президенттин Талас облусундагы өкүлү Бакытбек Нарбеков менен Темирлан Сарлыкбек уулунун сүйлөшүүлөрүнүн натыйжасында ишкер жалпы эмгеги 8 млн 700 миң сомду түзгөн айкелдин түп нускасын белекке берген. Ал эми аны алып келүү, постамент даярдоо, орнотуу иштерине «Альянс Алтын» өнүктүрүү фонду 1 млн 160 миң сом бөлгөн.
