Кыргызстандагы ар бир төртүнчү үй-бүлөдө кеминде бир эмгек мигранты бар.
Бул тууралуу бүгүн, 7-июнда Эмгек, социалдык камсыздоо жана миграция министри Кудайберген Базарбаев Бишкекте өтүп жаткан форумда билдирди.
Министрдин айтымында, бүгүнкү күндө дүйнөдө 181 миллиондон ашык эмгек мигранттары бар. Алар мигранттардын жалпы агымынын 60%дан ашыгын түзөт.
«Кыргызстанда миграция 3 миллион адамдын – алардын балдарынын жана үй-бүлөлөрүнүн тагдырына таасирин тийгизүүдө. Өлкөдөгү ар бир төртүнчү үй-бүлөдө бирден кем эмес эмгек мигранты бар. Мигранттардын негизги курагы 18 жаштан 45 жашка чейин», — деди министр.
Форумда айтылгандай, акыркы жылдары тышкы миграцияда аялдардын көбөйгөнү байкалган.
Улуттук статистикалык комитеттин маалыматы боюнча, 2014-жылдан бери тышкы да, ички да миграцияда аялдар эркектерден алда канча көп. 2018-жылы алардын саны дээрлик эки эсе өскөн.
7-июнда Бишкекте миграция маселелерине арналган форум өтүүдө. Ага Министрлер кабинетинин төрагасы Акылбек Жапаров, БУУнун Кыргызстандагы туруктуу өкүлү Озонния Ожиело, Эмгек, социалдык өнүгүү жана миграция министри Кудайберген Базарбаев катышууда.