Казакстандын президенти Касым-Жомарт Токаев 29-августту Жалпы улуттук аза күтүү күнү деп жарыялады. Бул тууралуу ал Твиттердеги баракчасына жазды.
«Жамбыл облусунун Байзак районундагы адам өлүмү менен коштолгон кайгылуу окуяга байланыштуу 29-августту Жалпы улуттук аза күтүү күнү деп жарыялайм. Каза болгон аскер кызматкерлери менен куткаруучулар чыныгы баатырлыкты, нагыз жан аябастыкты көрсөттү. Баатырларыбыздын ысымы эл эсинде түбөлүк сакталат», — деп жазды Токаев.
Эске салсак, 26-август саат 19:00 чамасында Казакстандын Жамбыл облусундагы аскердик кампадан өрт чыгып, жарылуу болгон. Кырсыктын кесепетинен 13 адам каза таап, 98 адам ар кандай жаракат алган. Ошондой эле 3 адам дайынсыз жоголгон.