Кечээ, 26-июлда Билим берүү жана илим министрлиги биология жана информатика боюнча эл аралык олимпиадаларда байгелүү орундарды алган окуучуларды сыйлады.
Медаль жана белектерди окуучуларга министр Болотбек Купешев тапшырды.
Сыйлыктардын бири 19-22-июль күндөрү Лиссабондо (Португалия) өткөн биология боюнча эл аралык олимпиадада коло байге уткан «Сапат» билим берүү мекемесине таандык Курманбек баатыр атындагы Жалал-Абад лицейинин окуучусу Бакытнур Ажыбаевге берилди.
Кыргызстандын атынан олимпиадага Бакытнур Ажыбаевден тышкары Бишкек шаарындагы №56 мектептин 11-классынын окуучусу Элина Рамазанова, Чүй облусундагы Жайыл баатыр атындагы лицейдин 10-классынын окуучусу Дмитрий Доценко, Талас облусундагы «Манас Ата» лицейинин 10-классынын окуучусу Арген Азанов катышкан.
Ошондой эле 19-25-июнда Сингапурда өткөн информатика боюнча эл аралык онлайн олимпиадада коло байге алган окуучуларга да сыйлыктар тапшырылды. Ал сынакка Кыргызстандын атынан «Сапат» эл аралык билим берүү мекемесинин 4 окуучусу бир команда болуп катышкан:
— Данияр Бейшекеев, М. Субакожоев атындагы Нарын лицейинин 10-классынын окуучусу;
— Ислам Давлетов жана Артур Айдаров, Ч. Айтматов атындагы Бишкек лицейинин 11-классынын окуучулары;
— Тенгиз Беккоёнов, Курманбек баатыр атындагы Жалал-Абад лицейинин 9-классынын окуучусу.
