АКШда 12-15 жаштагы өспүрүмдөрдү да коронавируска каршы эмдөө башталды. Бул тууралуу «Reuters» маалымат агенттиги жазды.
Буга чейин АКШ тамак-аштын жана дары-дармектин сапатын санитардык көзөмөлдөө башкармалыгы «Pfizer/BioNTech» компаниясынын вакцинасын 12 жаштан өйдөкү өспүрүмдөргө да саюуга уруксат берген корутундусун чыгарган.
Бул боюнча АКШ президенти Жо Байден 12-майда жасаган кайрылуусунда COVID-19дун 12 жаштан жогорку балдарга да жугуу коркунучу бар экенин, пандемия башталгандан бери АКШда 17 жашка чейинки 3 миллион өспүрүмгө илдет жукканын эскертип, ата-энелерди балдарын эмдөө борборлоруна алып келүүгө үндөдү.
Ошондой эле «Pfizer» компаниясы кийинки этапта, тагыраагы, сентябрь айына чейин 2 жаштан 11 жашка чейинки жеткинчек, тестиерлерге да колдонууга уруксат алуу аракетин көрүп жатканы маалым болду.
Белгилей кетсек, АКШда «Pfizer» вакцинасы менен 16 жаштан өйдөкү бардык жарандарды, ал эми «Moderna», «Johnson & Johnson» компанияларынын вакциналары менен орто жаштан жогорку адамдарды гана эмдөөгө уруксат берилген.