Бүгүн, 28-январда шайланган президент Садыр Жапаровдун кызматка расмий киришүү үчүн ант берүү аземи өтүп жатат. Ал арада жеринен кабарчыбыз аймактардан, жер-жерлерден келген айрым адамдар азем өтүүчү жайга киргизүүнү талап кылып жатышканын кабарлады.
Коопсуздукту көзөмөлдөгөн күч органдары менен сырттагы элдин ортосунда нааразылык жагдай жаралып, аксакалдар: «Садыр Жапаровду кызматка биз алып келгенбиз. Филармонияга биз да киришибиз керек, жолду ачкыла!» — деген талап койгон.
Маалым болгондой, нааразы топтун атайын чакыруусу болбогон. Андыктан күч органдары ичкери кирүүгө уруксат берген эмес.
Буга чейин Президенттин аппаратынын жетекчиси Сүйүнтбек Касмамбетов ант берүү аземине атайын чакыруу менен гана кирүүгө болорун, келген коноктордун 70%ын карапайым эл түзөрүн маалымдаган. Андан сырткары бардык катышуучулар ПЧР-тест тапшырууга милдеттүү болгон.